城中鏡：徐立之話卸任似籌備結婚
香港大學校長徐立之本月底卸任，校方尋日提早為佢搞個歡送會，吸引幾百個師生同知名校友參加，徐太低調現身，台灣文化部部長龍應台亦親筆寫信祝福佢，座上客仲有前商務及經濟發展局局長馬時亨。徐立之笑言，卸任校長就好似結婚咁，籌備咁耐呢一日終於都嚟到，佢形容，尋日係佢人生其中一個最美好嘅時刻，而港大呢十二年更加係佢人生嘅第二美好時光，但佢依然相信the best is yet to come（最好的尚未來臨）。
歡送會出動埋紙板徐立之，有徐校長嘅「粉絲」仲舉晒牌，話「我愛之之」。
徐立之宣布唔再續任嗰陣，有好多大機構向佢招手，依家真係卸任喇，之前嘅聘帖竟然石沉大海，徐立之笑言，希望各位老闆主動聯絡佢傾吓新工喎！至於會唔會出任擬重設嘅創新及科技局局長，佢話冇同政府傾過呢個問題。
為紀念徐立之○二年開始出任港大校長，馬時亨特別帶咗支○二年嘅香檳幫佢餞行，同場嘅港大首席副校長錢大康就透露，港大計劃增聘兩名副校長，減輕現時五名副校長嘅工作，加上其中三名副校長退休在即，預計新人選最快半年後就返工喇。
