城中鏡：鄧愛嘉年底北京辦婚禮
鄧肇堅後人鄧愛嘉與拍拖四年的英國男友Christopher日前舉行訂婚派對，兩人嘅婚禮定咗十一月舉行，前晚除有雙方家長在場外，亦有一班準新娘嘅好朋友，包括曹穎惠、邢嘉倩、曾昭怡及著名公關鄭紹康等在場見證。
鄧愛嘉（中）與英國男友（左）日前舉行訂婚派對，任公關嘅好友鄭紹康（右）都有出席。
鄧愛嘉透露，去年十二月去日本時，男友向佢求婚，講到當時情況佢就開心：「我以為只係去日本旅行慶祝我生日，估唔到佢喺我生日第二日向我求婚，真係好驚喜。」雖然婚禮確實日期未最後敲定，但已打算喺北京嘅中國會舉行，鄧愛嘉話：「諗住順便請Christopher嘅英國朋友去北京遊覽見識吓，而且Christopher都喺北京讀過書，或者婚禮之後會再喺香港同英國簡單咁食飯慶祝。」
