沙田馬場尋日舉行寶馬香港打吡大賽,個馬匹出賽名單唔單止有曾偉雄,仲連鄭裕彤都有馬出賽?唔通佢哋靜靜雞又做咗馬主?了解之下,先至知原來係同名同姓、巧合而已,轉過頭,見到馬會大董、前會計界立法會議員李家祥,原來同佢同名同姓嘅一人係中國民航局局長,講起姓名嘅趣事,真係好過癮。

鄭裕彤

曾偉雄

李家祥

陳偉南(左起)、陳張思敏、陳幼南全家出動為愛駒打氣。

馬場全日人頭湧湧非常墟冚,好多名人都嚟湊熱鬧撐朋友場,順道幫朋友嘅愛駒打氣。我哋求證下發現,馬主曾偉雄並唔係警務處處長曾偉雄,而馬主鄭裕彤亦並非新世界發展創辦人鄭裕彤,佢哋分別係駿騎「精精彩彩」嘅馬主曾偉雄及良駒「金貴人」嘅馬主鄭裕彤,兩人分別都喺最近拉過頭馬,其中馬主鄭裕彤可稱為青壯版,佢哋一家仲係第一次養馬添,尋日鄭家有爸爸鄭明亮、弟弟鄭裕偉等一齊現身馬場,感受大賽氣氛兼享受家庭樂。

陳幼南夫婦偕父為愛駒打氣

至於曾活躍政壇嘅李家祥尋日亦現身馬場,佢都有曾經被認錯做民航局局長李家祥嘅經驗,話說有次佢朋友喺北京機場見到有本雜誌做咗個李家祥嘅訪問,誤以為係佢嚟嘅所以拎畀佢睇,後來至知此李家祥不同彼李家祥。

另外,一向同馬航有合作嘅康泰董事總經理黃進達(Jason)尋日亦有現身,Jason話,暫時冇收到有客人怕坐馬航而要改行程嘅事,相信對公司嘅長遠影響不大。尋日有隻「馬來之珍」出賽嘅香港中華總商會副會長陳幼南同太太陳張思敏及爸爸陳偉南一齊為愛駒打氣,佢話爸爸五十年前開始已經喺馬來西亞有生意,有唔少朋友喺嗰邊,不過相信事件後機場安檢會更嚴密,唔擔心之後危險。

第一手消息請下載on.cc東網iPhone/iPad/Android/Windows Phone Apps