香港特區回歸後,雜音頻生,不特止沒有靜過一天,還愈來愈嘈,除廢柴政府管治無信無能外,近年半以來,更有人高調聲稱專登在此成立一隊「維和部隊」,爭佔輿論陣地,與反對聲音抗衡,咁香港人仲點有機會恬靜度日吖!

在有理說不清的環境下,世界核心價值統統反艇,例如,有人迷信「真理愈辯愈明」,家下,在鐮刀加錘仔紅旗下,已經像馬航飛機般,唔知飛咗去邊,更消失得無影無蹤矣!

香港警察本是受港人尊敬的一隊有聲譽的世界級優秀隊伍,自從換了一套恍如九龍塘時鐘酒店門口「實Q」的制服後,面貌和形象就一洗過去英偉硬漢的風姿,叫人痛心!

嗱!就傳媒人光天白日被斬之偵查,香港警務處處長曾偉雄指「無直接證據顯示與新聞工作有關係」後,立刻遭人異議。本人永遠秉持中立公正原則寫評論的,喺呢件「偵查」事件上,我不能偏幫「行家」(申報先吓!我都係算個傳媒人),我覺得應站出來,替警隊一哥說句公道話;第一,佢一定係經過調查,清楚事實,才敢公然第一時間撲出來向外公布,你哋又唔見佢講以前那些仲未有「破案」的舊case?即表明沒真憑實據,佢又點會親自出馬開記招吖?

第二,也是最重要的,即如當一個警察返工前被人伏擊,佢真係未必關當差嘅事喎!事實證明,好多時,係欠大耳窿錢、爭外圍數、搞咗人哋老婆,甚至扮放蛇召妓唔畀錢……呢啲新聞常見啦!所以,曾處長好應該早日破案,還自己清白!

彭志銘

次文化考古學家,對城中潮語有深入研究,博徵博引,廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps