SUN搞作：少膽虫手記：滅蟲計劃
少膽虫一返工，偏執部的「卡卡」、「卡卡」之聲不絕於耳。一眾虫兒滿臉煩厭，一看就知在淫賤黎房中傳出嚟，向來鍾意扮大佬、擸着數嘅少膽虫，肯定唔會錯過今次嘅上位機會啦！
「黎黎！你做咩成朝喺度撞嚟撞去呀？」一推開道門，即見個肥腫難分嘅疑似「蟈產耆英」，拖住個行李篋，喺間房入面好似拜四角咁，係咁撞牆又撞牆。「虫仔，我搵到殺蟲方法喇！」「腦……腦細，你點解要殺我呀？」少膽虫感到不安，生命受威脅。「餵你食飯咁多年都咁蠢嘅！呢排有網民話喎，拖篋有助趕走害蟲，佢哋親身試法，真係Work！」見淫賤黎信十成，少膽虫馬上附和：「堆填區成日飛埋啲蝗蟲過嚟，阻住同事做嘢，一於趕走晒佢哋！」
第二日，淫賤黎拉埋少膽虫去「嚟膠府」拖篋趕蟲，但見淫賤黎拎住個加大碼「RE毛嘩」，見到膠府門口，起勢衝入去。迅雷不及掩耳，四方八面突然有殺蟲水飛出，幾隻手向住淫賤黎猛咁噴，啲人大叫：「真正嘅大蟲出現啦！宣淫販賤，我哋噴死佢！」
