政壇：搞搞政：電視風雲屢犯錯 黨友狂插Greg蘇
港視主席王維基連日炮轟當局對流動電視牌照嘅規定，質疑執法不公，通訊辦通訊事務總監利敏貞連日同佢過招，一個好戲，一個有大將之風，大家鬥得不相伯仲。相較之下，負責廣播事務嘅商務及經濟發展局局長蘇錦樑（Greg蘇）就潛水當冇到，問責無人，連民建聯中人提起Greg蘇都狂數佢嘅不是。
設計圖片及對白
原本係黨友嘅建仔中人講起Greg蘇都唔多客氣，話免費電視牌照事件中Greg蘇已最少犯咗三大錯誤，好彩唔係遇上選舉，否則建制派選情凍過水。第一錯係Greg蘇如果有小小政治敏感度，應該一早向建仔中人放風，通知一聲政府唔會向港視發牌，一來等建制派做足心理準備，二來假如反應太大，政府仍有機會完善政策，結果建制派被透明，事後被街坊問到口啞啞。
第二係無做足防火牆，電視牌照問題咁惹火，Greg蘇卻無要求幫口，建制派被迫袖手旁觀，消息混亂。仲有呀，據聞Greg蘇被指欠缺人情味，仲要質疑建制派點解無幫政府擋駕護航哦，公職隱形，後援會又失火，蘇局長喺電台問題上真係中伏兼傷重囉。
