政壇：許智峰被指似細路發爛渣
中西區區議會轄下一個小組會早前爆衝突，白鴿黨將呢單嘢引伸到打擊言論自由層面，不過，事件始作俑者許智峰喺會上嘅表現，亦有好多唔同嘅說法，民建聯離島區議員周浩鼎尋日喺一個論壇上，就反指議員擾亂議會秩序，好似小朋友玩遊戲，輸咗就發爛渣。工聯會「雙料」議員郭偉強都加入戰團，喺facebook留言話主席有絕對權力處理會議流程同埋秩序，批評許想玉石俱焚，非常幼稚同唔成熟。
周浩鼎話，佢睇番YouTube片段，見到許唔接受主席裁決，之後仲掙扎反抗，保安都被推跌，依家件事就係「三輸」，許智峰唔好受、保安受傷、警方被屈，何必呢？許就死撐，話區議會審批公帑運用應該公開，呢件事係踐踏議會尊嚴喎。
