政壇：梁智仁獲贈聽筒幫醫管局診症
醫院管理局成日畀病人組織鬧問題多多，梁智仁尋日就首次以醫管局主席身份，出席由長期病患者關注醫療改革聯席舉辦嘅座談會。聯席代表趁機向梁醫生送上醫生診症用嘅聽筒，寓意希望他聆聽病人意見咁話。一向作風低調嘅梁醫生好識做，即刻掛個聽筒喺自己頸，仲笑到見牙唔見眼，睇嚟真係好有心幫醫管局積壓嘅問題「診症」喎。
收到團體贈送的診症用聽筒後，梁智仁即笑哈哈戴上頸。
座談會有二十六個病人團體、大約五十人出席，個個都好踴躍發言，由醫護人手不足、醫護人員態度差，以至復康車輛唔夠，都有提及。特別係有人提到矯形外科同骨科轉介服務唔夠協調，搞到部分需要復康治療嘅燒傷病人，要經兩次轉介先有職業治療師跟進，安排着壓力衣。唔知梁醫生係咪讀骨科出身關係，對矯形創傷病人特別關心，聽完病人呻之後，都拍心口話問題要正視，仲話問題睇落好似「小意思」，但都會返去同局方提出喎。講到醫護人手唔夠，佢就承認短期內未必解決到，都要長遠措施配合。
