政壇：龍小菌請高官食檸檬

尋日嘅活動，唔少司局長都有到場，龍小菌就話唔滿意香港未有普選，政務司司長林鄭月娥喺台下想同佢握手，龍小菌都只係同佢鞠躬，畀咗大大隻檸檬司長食。除咗林太外，保安局局長黎棟國上台頒發紀念品嗰時，龍小菌都照辦煮碗，先同局長鞠躬，局長伸手都當無到，幾秒後局長惟有收番隻手。

我哋事後問番龍小菌，佢就話好難同班高官握手，因為政府冇回應到社會好多訴求，想話畀林太聽，市民想要真普選，但唔知對方做唔做到。佢又透露，尋日到場先知道有咁多高官，所以係即時諗到用呢種方法表達訴求，重申鞠躬已經表達咗善意喎。