政壇：鬍鬚曾想當年執過字粒
科技日新月異，財政司司長曾俊華（鬍鬚曾）尋日喺網誌大講印刷業嘅見聞，佢話日前出席香港印刷業商會和職業訓練局（VTC）嘅合作備忘錄簽署儀式，見識到最新嘅印刷技術，佢因此憶起年輕時曾經喺美國執過字粒，跟住又話印刷技術發展落去，好似《哈利波特》電影內嘅「魔幻報紙」就會成真。
鬍鬚曾話，想當年佢喺紐約唐人街嘅一間中文報章兼職，放學後會去印刷房幫手執字粒，不過由於佢唔係咁熟手，一篇幾百字嘅短文都要執成個鐘。之後佢去麻省理工讀書，又因為要幫學生活動印製宣傳單張，而不時去建築系內嘅實驗室做印刷實驗，又話當時佢哋試過利用感光物料製作絲網，令絲網可以好似相片嘅底片咁，將影像化成印模。
佢又話，坊間唔少兒童書同售樓書開始採用「擴增實景」（Augmented Reality）嘅印刷技術，又話如果呢種技術繼續發展落去，將會出現《哈利波特》電影內嘅「魔幻報紙」。
