香港大學民意研究計劃近日接連受挫,繼政協常委李家傑早前點名狠批民調唔中肯後,再有網站質疑港大調查特首梁振英(CY)民望時,將零分嘅極端評分都納入計算,變相拖低CY嘅支持度,被泛民視為民意研究權威嘅計劃總監鍾庭耀尋日解畫,但佢唔係回應點解要咁樣計,而係責難批評及提質疑者吹毛求疵,佢話,「有人用『顯微鏡』或『放大鏡』去睇」佢哋嘅民調。民調若本身有問題,市民戴乜眼鏡睇都會發現問題,因為經唔起考證,唔通鍾庭耀認為老花鏡、平光鏡安全啲?

設計圖片及對白

學者追求自己嘅學術研究精準係應有嘅態度,但鍾庭耀尋日嘅回應卻似乎有諉過他人嘅意思,佢話啲人對民調咁緊張係因為政治氣氛緊張,而佔領中環行動牽動唔同人士嘅關注,所以有啲人用「顯微鏡」或「放大鏡」去睇港大民意研究計劃嘅調查。佢期望大家客觀、以事論事去睇,仲希望更多專業學術界參與添。佢雖然講得輕描淡寫,但依家係有人質疑佢哋發布嘅民調並冇真實反映接受調查人士嘅意見,呢啲並非數據瑕疵,賴人哋用乜嘢鏡有用咩?

拉低咗CY評分

鍾庭耀及其民意研究計劃被質疑唔準確已經唔係第一次,行政會議成員張志剛早前就質疑港大民意研究計劃公布嘅民調結果,質疑網站公布的原始調查數據明明有近六成二受訪市民給予特首梁振英五十分或以上、即屬合格水平的評分,即使扣除極高或極低的評分後,梁振英平均有近五十點七分,同樣屬於合格,但民研計劃的新聞稿卻指評分為四十七點五分。消息話,港大係計算咗九十一人給予零分嘅樣本,因而拉低咗平均分。

連串批評聲音之後,有泛民中人質疑發聲者打壓學術自由,情況好似多年前嘅翻版,尋日鍾庭耀都話,希望多啲專業學術界人士參與今次討論,打嘅亦係學術自由牌。既然係歡迎探討,佢都係花啲心思研究點樣以學術服人喇!

第一手消息請下載on.cc東網iPhone/iPad/Android/Windows Phone Apps