一意孤行推醫保 自取其辱必難產

件事係咁嘅，前朝政府搞嘅自願醫保計劃不得人心，有口皆悲，但當局一直死心不息，高永文放口風，話最快年中會諮詢公眾喎。不過咁，當局可能擔心反應冷淡冇人吼，今次加咗啲小恩小惠，考慮以家庭為免稅基礎，鼓勵市民為家人買醫療保險。高永文仲賣花讚花香，話自願醫保可以提升現有私營保險嘅質素，希望可以吸引中產多用私院服務，紓緩公院壓力喎。

咁啱得咁蹺，尋日係「世界睡眠日」，專家話唔夠瞓會影響思維。睇嚟高永文梗係未瞓醒嘞，唔係點會喺垃圾桶攞自願醫保計劃出嚟獻世吖。講真，呢個被指「雙重徵稅」打劫中產嘅計劃，早就臭晒喇，連前醫管局主席胡定旭都話有所保留。當局漠視民意，係都要倒行逆施，簡直就係與民為敵！

講開又講，自願醫保根本就係個怪胎，以香港目前高度政治化嘅社會氣氛，無論當局點樣包裝，獲立法會通過嘅機會可以話等於零，再推銷盞浪費時間咋。嗱，高永文自己都話，「最近意識到有危機」，如果市民唔買帳，最終「一定會難產」。既然係咁，不如早早收皮罷喇。

當局嘅如意算盤係咁打嘅，原本預留用於醫療融資嘅五百億元，其中五十億元用嚟搞醫保計劃，剩低四百五十億元設立基金，用於應付醫管局不時之需等用途。其實，無論點包裝都係嘥氣，當局與其自欺欺人，夾硬推行自願醫保，不如順應民意，徹底整頓醫管局，將資源用嚟改善公營醫療服務仲實際喇。

係人都知，醫管局官僚無能，管理無方，尤其係前食衞局局長周一嶽渾渾噩噩，搞到資源錯配，肥上瘦下，公立醫院七國咁亂，前線人手不斷流失，陷入「七個蓋冚十個煲」嘅困境，醫療事故不絕如縷，沒有最恐怖，只有更恐怖。曾幾何時，香港醫療水平名列亞洲前茅，港人引以為傲，近年來醫療優勢逐漸消失，家陣已經被台灣後來居上，諗起都可悲。

話到尾，港府推出自願醫保計劃根本就係立心不良，無非想推卸公共醫療責任，剝奪中產人士唯一嘅公共福利，無論點改頭換面，都掩蓋唔到打劫中產嘅本質。咪話太一叮唔提醒吖，將公共醫療服務市場化、私有化，世界各地成功例子簡直係鳳毛麟角，無論港府費幾多心思推銷自願醫保，結果都只有一個，就係自取其辱嘞，叮！