潮語「醫鬧」係嚟自大陸，係「醫院鬧事」嘅簡稱，意思係病人或病人家屬大鬧醫院，要求索償咁解。

適逢馬航客機失蹤事件，全世界嘅焦點都去晒南中國海，而唔係中南海，所以今次兩會相對好似無乜人留意。相信大多數人，都係關心架飛機到底去咗邊，多過兩會期間中共千篇一律嘅黨八股。最令人齒冷嘅係連負責安撫馬航失蹤中國人家屬嘅共幹，都叫啲家屬唔好節外生枝。大拿拿百幾條人命生死未卜，加上馬來西亞當局閃閃縮縮嘅態度，訊息又混亂，中國政府應該為人民去努力跟進事件，但換嚟嘅係官員一啲咁不近人情嘅說話，到底人命喺國家眼中值多少?大家可想而知。有點樣嘅政府，就有點樣嘅人民。中國人嘅行為，都一直為人詬病。有啲嘢，真係只會喺中國發生，例如兩會期間領導人都有提過嘅「醫鬧」，就真係令人嘆為觀止。

因為大陸嘅醫療制度同香港好唔同，如果病人遇上醫療事故，真係投訴無門，想要求賠償就更加諗都唔好諗。所以，每當大陸嘅醫院發生醫生醫死人，又或者係啲醫療錯誤導致有病人受害，家屬就會去到醫院大吵大鬧，甚至對醫生護士們動粗，希望事件得到關注。有時「醫鬧」未必真係發生醫療事故，有啲人純粹係為勒索醫院，企圖敲詐，仲會喺醫院大堂擺設靈堂，或者成條死屍放喺醫院當眼位置，以其他方法搗亂。好多時就算搵公安嚟，啲公安都未必受理。吓?咁都得? 點解唔得?中國人為咗錢，有乜做唔出呢?甚至有香港大學背景，港人管理嘅醫院，都不能幸免遇上「醫鬧」，連女護士都畀人毆打，令好多醫務人員活在惶恐之中。難怪兩會期間，連習總都要出聲要嚴肅處理「醫鬧」問題。

查實係人都知，「醫鬧」同好多大陸問題一樣，都係法制嘅問題。但係就算搞好法制，守法同執法都係一個問題，始終大陸對法治法律有幾尊重，大家心知肚明。睇佢哋對基本法有幾尊重就知啦!

第一手消息請下載on.cc東網iPhone/iPad/Android/Windows Phone Apps