財政預算案啱啱公布,立法會議員梁國雄(長毛)已揚言要「拉布」,佢仲事先透過預算案提問攞資料添。我哋日前先透露政府已收到六千八百多條立會議員就預算案提嘅問題,最搞笑係長毛無啦啦問商務及經濟發展局,過去五年花咗幾多人力同公帑喺處理UFO事宜,佢大條道理解釋,問UFO係等辯論同「拉布」時都有得講吓喎。長毛動作頻頻,但剪布機制卻冇進展,立法會主席曾鈺成對「剪布」可以話係依然束手無策。

設計圖片及對白

長毛總共提咗幾百條問題,其中一條就係究竟五年有幾多宗市民目擊UFO嘅報告?部門因處理UFO嘅事用咗幾多人手及錢等。長毛話,呢條問題並唔係因為有街坊或團體託佢問,至於UFO事宜係咪真係由商經局回答,長毛都唔係太清楚,總之問咗先。

研剪布又煲冇米粥

另一方面,早前曾鈺成就「剪布」四招向議事規則委員會提意見,委員會尋日就召開閉門會議討論,兩個鐘會議後都係煲冇米粥收場。建制派議員梁美芬話,「剪布」要經內務委員會三分之二議員贊成、再交大會分組表決嘅做法係違反《基本法》。泛民陣營嘅李卓人就認為,早前長毛就曾鈺成「剪布」提出嘅司法覆核,一日未有裁決,都唔應該商討「剪布」問題。大家拗不停,委員會主席譚耀宗都只好死死地氣咁話,「剪布」方案係唔會趕得切喺財政預算案「拉布」時大派用場o架喇,意味今年將繼續「拉布」馬拉松,分分鐘又再步入財政懸崖危機。

第一手消息請下載on.cc東網iPhone/iPad/Android/Windows Phone Apps