四圍飛嘅人經常要解決時差嘅煩惱，日前我哋講過阿里巴巴話事人馬雲七日遊三國，佢當時呻飛得密並唔好受，點解？原來有時差之苦，佢因為時差瞓唔着覺，靠睇自己嘅八卦新聞解悶，跟住仲回應、反窒兩句，闢謠都好瀟灑。
馬雲繼續喺網上通訊「來往」中貼文，並就睇到嘅八卦新聞做回應，對於有人質疑阿里連續兩單注資本港兩間上市公司嘅行動係要借殼上市，結果兩隻股炒到升幾倍，馬雲似乎心情好靚，貼咗個偷笑嘅表情，又話「上市真有那麼難嗎？」佢又回應咗網上傳佢二月份同阿里巴巴高層陸兆禧吵咗一鑊，三月份馬雲就將原本由陸兆禧掌管嘅無線業務許可權交畀另一人，馬雲嘅回應係蠱惑嘅表情，並說：「要是知道我們天天會吵架咋辦呢？」
佢嘅回應風趣幽默，又輕輕拆解疑雲。到最後，馬雲勸告造謠者認真生活，快樂工作吧！對方係咪要回以一個受教嘅表情呢？
第一手消息請下載on.cc東網
