政壇：商場千篇一律虞茱迪心痛
本港商場被批評千篇一律、毫無特色，時尚界名人虞茱迪（Judy）與先施百貨行政總裁馬景煊（Philip）都話有同感，Judy仲好肉緊咁形容情況十分嚴重，佢話好多商場一味為迎接內地旅客而揀選租客，通街都係珠寶錶行及中西藥房，咁香港人去邊度買嘢呢？點解香港冇晒自己嘅Life Style？香港應該喺內地客及本地客之間取得平衡，唔可以一味以金錢掛帥。
虞茱迪（左）旗下時尚品牌開幕，陳明耀（右）抽空捧場。
Judy曾任香港明天更好基金理事多年，經常到世界各地宣揚香港政經環境嘅前景，見到香港商場變成千篇一律，直言感到心痛。同樣做咗明天更好基金理事多年嘅Philip亦話，一早已睇到問題存在，所以佢哋店內超過一半貨品都係自己採購，有時公司買手喺歐洲停留成個月，就係想確保貨品有特色。
所以話，無論做商場定係生意，都要求創新，香港玩具協會榮譽主席陳明耀透露，佢間公司去年出產一隻電動玩具狗，識得感應主人嘅手勢及指令，做坐低、打觔斗等動作，結果喺歐洲大賣近一百萬隻，今年佢將食住條水推出電動玩具貓，希望闖出新商機。
