比特幣(Bitcoin)呢種虛擬貨幣價格波動頗大,少啲經驗都蝕錢收場。財爺曾俊華(鬍鬚曾)尋日出席青年論壇時,就有同學問佢會唔會管制比特幣,佢強調比特幣唔係真實貨幣,仲用網上遊戲使用嘅虛擬兵器做比喻,話兩者冇乜分別,既然政府唔規管「刀劍」,點解要規管比特幣呢?不過,鬍鬚曾就冇交代佢係咪機友,否則可以同學生交流吓打機心得喇!

鬍鬚曾再解釋,政府擔心好多人會用比特幣嚟洗黑錢,交易雙方身份唔確定,貨幣後面又冇嘢支持,政府對此都相當關心,皆因除咗鬍鬚曾出聲,尋日又發聲明,重申比特幣具高投機性及潛在風險,唔受《證券及期貨條例》保障,消費者可能會蒙受顯著金錢損失。

除咗比特幣外,有同學就話香港競爭力被新加坡趕上,鬍鬚曾透露,早前見過法國財政部長,對方話今年多咗一倍法國人移居香港,由兩萬人上升到近五萬人,原來因為法國薪俸稅高過香港四分之一。最後佢仲講到明冇興趣參選特首,寧願退休做老闆,又形容自己人工「適當」喎。

第一手消息請下載on.cc東網iPhone/iPad/Android/Windows Phone Apps