政壇：鍾國斌籲准入越柬緬傭
本港不少家庭都有請外籍傭工，以前菲傭佔據大部分市場，近年雖然多咗印尼、泰國甚至孟加拉等，但自由黨議員兼紡織及製衣界代表鍾國斌（Felix）卻話，港府應該考慮開放更多國家嘅傭工申請來港，佢認為柬埔寨、越南等都係好地方，而且佢正游說緬甸當局，每年向香港批出二萬個緬甸女傭名額喎。嘩，一下子多咗三個國家，傭工來源真係唔使憂喇。不過，本港入境方面至今仲好多限制，Felix直斥有啲規定已落伍，要盡快檢討，睇嚟佢好快揸雞毛掃促保安局做嘢啦。
設計圖片及對白
廉價租仰光工業園區
出身商界嘅Felix對外傭事務忽然咁上心，似乎係接咗富貴黨為外傭僱主服務、藉此箍實中產票嗰瓣工作，Felix話，如果緬甸批出更多女傭名額，一定可以紓緩本地聘請外傭時，長期求過於供嘅情況，而呢個問題嘅源頭，其實正係當局嘅規管政策冇與時並進。
佢話，其實東南亞地區有唔少國家，好似柬埔寨、越南等地都係輸入外傭嘅好地方，但奈何香港現行嘅家庭傭工政策規定，基於入境管制及保安考慮，柬埔寨、古巴、老撾、朝鮮及越南等地國民都唔可以來港做傭工。佢認為，呢啲國家過去因為戰亂，政府擔心有大批難民湧到香港先有咁嘅管制，但時移勢易，唔少國家已經停止內戰，政府應該檢討政策，放寬更多國家傭工來港工作喎。
講開又講，Felix睇中緬甸女傭呢個新供應地同佢個人生意有關，佢早前以一元呎租，喺緬甸仰光發展當地首個港商工業園區，改以「Made in Myanmar（緬甸製造）」嘜頭繼續搵錢，據聞生意不跌反升添，亦因為呢次投資，佢對緬甸多咗了解，所以有引進緬甸女傭嘅構思。
