競爭創新兩皆空 香港難復當年勇

唔係太一叮杞人憂天，城中富豪都係咁講o架。呢，佢形容香港係「被寵壞了的孩子」，民粹主義氾濫，唔使五、六年，社會就會「面目全非」。佢仲指香港競爭力愈來愈唔掂，港資企業無論喺內地定國外，競爭力都「不復當年勇」。城中富豪為香港開「藥方」，要提高競爭力，就要重視教育，喺投資同發展創新方面急起直追，佢話可以借鏡新加坡嘅經驗喎。

唉，講到借鏡新加坡經驗，香港簡直係羞家喇。太一叮尋日至講過，近年「雙城記」競爭香港幾乎逢比必輸，香港大學啱啱至喺「全球大學名氣榜」畀新加坡國立大學拋離九條街，人哋進身亞洲三甲，香港差啲連五十強都入唔到，你話點比吖？

正所謂，逆水行舟，不進則退，香港競爭力好似王小二過年咁，一年不如一年。舊年世界經濟論壇公布全球競爭力排名，本港排第七，話就話唔算低，但就比排第二嘅主要競爭對手新加坡落後足足五位。問題出喺邊度呢？報告指香港最大問題係欠缺創新能力，建議香港提升教育質素以及創新科技發展喎。

嗱，呢的就叫英雄所見略同嘞，本地富豪同國際專業機構開出同樣「藥方」，證明香港嘅病根就係競爭優勢漸失。可惜吖，藥方就有嘞，但可唔可以藥到病除，真係令人懷疑。

就講發展科技產業吖，英國有教育機構前排公布全球學術創新指標排名榜，按企業對科研學者嘅投資列出全球三十強，南韓獨佔鰲頭，新加坡排第二，台灣排第六，中國內地排第七，香港僅排第二十位，投資額只有南韓嘅五分之一，喺亞洲四小龍包尾。港府科技投入似有若無，點樣發展創新科技喎！

當然喇，本港競爭力同創新能力不斷下滑，政府無能固然係其中一個主要原因，而另一個原因就係社會愈來愈政治化，亦即係富豪所講嘅民粹化。即係咁，香港變咗被寵壞嘅孩子，港府無能激發民怨固然係禍源，政客無良搞風搞雨亦難辭其咎o架。係人都知，經濟民生最易受到政治影響，香港本來已經陷於政治泥沼不能自拔，家陣仲隨時因為政改爭拗而一拍兩散添，想有運行都幾難喇。

無可奈何花落去，似曾相識香江夢。香港不思進取，長期靠食老本，試問點同人哋競爭吖？香港究竟何去何從，大家真係要好好反思喇！