SUN搞作：打橫嚟講：港人有乜得罪你哋呢？

小學雞都知，「代表」者，即係……等等先，我都要查查字典才敢說，因家陣，乜春都要講證據o架！手上，呢本有祖國背景嘅中華書局（香港）出版的《高級新詞典》內，「代表」的解釋有三：

1/受委託去辦理事情：代表公司出面交涉；

2/被委派的人：全權代表／校方代表；

3/體現某種意義或象徵某種概念：劉備、關羽、張飛代表三種不同的性格。

好啦！當清楚明白「代表」的原義時，咁！「香港代表」又係乜呢？

不用多說，此等代表乃係鵪鶉、奴才、傳聲筒、小丑、擦鞋仔、人渣（因有貪湯）、港奸、戲子，最新身份係「解籤術士」……替領導人的講話解說再詮釋，加鹽加醋……

嗱！佢哋唔係由香港人「直選」出來的，而係「被委派」的；佢哋無為爭取香港福祉而交涉，但卻體現種種醜陋意義或象徵各式卑劣概念。這全都不言而喻，簡單得有如呼吸般，你們都懂的了！

依家，中共中央再不提「港人治港」和「高度自治」，並無視《基本法》立法原意，高度粗暴介入香港事務，源自香港廢柴政府一班庸才高層，無法好好管治香港，加上一班人渣禍港，再有一群同上邊有偈傾的既得利益者聯同西環不斷唱臭香港，誇大香港亂象，並有人用維穩費豢養黑勢力攪局，令中央誤收錯風，做錯決定。

其實，呢班小人代表，搞死香港，對佢哋有乜好處？我哋香港人有乜得罪佢哋祖先呢？要咁害我哋！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府