話說尋日驚蟄，少膽虫趁大好良機，拎咗淫賤黎時辰八字去橋底搵人打小人，平日冤屈盡洩，所以今日返工個人都精神啲，誰不知櫈都未坐暖，又畀腦細叫入房。

淫賤黎劈頭就問︰「你尋日去咗邊？」少膽虫講大話當食菜︰「喺屋企諗《爛果》將來囉！」淫賤黎怒吼︰「你呃人！咪使旨意甩身！」打小人單嘢咁快穿？少膽虫嚇到口窒窒︰「係、係誤會嚟……」「仲想抵賴？你上次喺公司睇J圖斷正，條數點計先？」原來講呢單，唔通淫賤黎想學白鴿黨罰鐵頭仁咁，要少膽虫畀「掩口費」？少膽虫即刻扮窮︰「腦細，我真係無o架！」

「自私精！」淫賤黎嬲到噴火，「自己睇完J圖又唔share畀我，依家問你攞又推三推四？真係唔打唔得！」話口未完，「啪啪」聲隨即響起，聽落十足似打小人。

第一手消息請下載on.cc東網iPhone/iPad/Android/Windows Phone Apps