城中鏡：郭炳江登天際與眾「童」樂

話說呢個「創藝童樂樂」計劃，畀嚟自舊區學校或基層家庭嘅兒童體驗多元藝術文化。由舊年第一屆推行到依家，受惠小學生已超過三千五百人。「創藝童樂樂」學生展演於新地旗下天際一百香港觀景台舉行，又有靚景又有大班得意可愛嘅小朋友表演音樂、舞蹈，場面樂也融融。

喺學生表演上，參與舞蹈工作坊嘅小朋友將日常生活融入舞蹈當中，着上色彩斑斕嘅舞衣展現自創嘅舞蹈，而完成音樂工作坊嘅小朋友就運用唔同類型嘅牧童笛，合奏活潑動人嘅旋律。郭生除為表演兒童打氣同頒發證書，仲同佢哋一齊將音符貼喺大型五線譜上，象徵新地同香港藝術節合力畀小朋友體驗多元藝術文化。

郭生欣賞小學生吹牧童笛時全神貫注、面露歡顏，唔知係咪勾起咗佢嘅童年回憶呢？