城中鏡：陳君宜生日P玩掟蛋糕
富商鄭躬明太太Qinnie陳君宜前日三十七歲生日，邀請咗大班好友包括江若琳、歐陽妙芝、羅霖、苟芸慧同設計師何國鉦等四十人喺屋企舉行生日派對。Qinnie生日時期撞正外國時裝騷，已五年冇喺香港過生日，佢話：「佢哋送咗四個蛋糕畀我，我哋一個都冇食，切完蛋糕大家已好興奮，仲開始玩『掟』蛋糕，我成個頭同身都係蛋糕，很瘋狂，不過最緊要開心，一班朋友慶祝已很難得。」
大班好友喺陳君宜屋企舉行生日派對，仲玩埋掟蛋糕添。
鄭躬明（右）送花畀老婆陳君宜慶祝佢牛一。
問佢老公送咗乜嘢禮物？佢開心咁話：「佢任我自己揀，佢驚買嘅嘢我唔鍾意。」咁有乜生日願望？佢話：「身體健康，唔好再喺生日期間受傷，上年我弄傷腳，今年隻手又甩骹，跛手跛腳好慘。」
