城中鏡：昆明恐襲名人震驚
早幾日喺雲南昆明發生血腥恐怖襲擊案件，震驚中外。東華三院日前舉行一百四十三周年慈善晚宴，大玩八十年代懷舊舞台主題，衣香鬢影，但席間話題都離唔開昆明恐襲案。
李鋈麟（右起）、馬陳家歡、副主席何超蕸同候任副主席陳祖恒齊出動支持慈善晚宴。
總理黃業光夫婦（左起）、陳曼芝、香港品牌總商會創會會員黃守迎同香港鞋業總會副秘書長鄧乃蔚喺晚宴喜相逢。
「生蛇」剛愈嘅施榮恆（右）擔任晚宴籌委會主席，太太李婉儀（左）全力打氣。
咁蹺東華三院副主席Alan李鋈麟今日會飛往當地扶貧，送贈四百張床畀山區學校，方便學童留宿。不過，依家風頭火勢，佢唔驚遇意外？Alan就拍心口話，昆明治安一向唔錯，避免去人多嘅地方就冇事喎。佢相信恐襲只係個別事件，仲笑言喺內地怕飲到假酒多過遇恐襲，所以此行連保鏢都唔使請喎！
施榮恆斥暴徒冷血
相反，香港品牌總商會副會長GiGi陳曼芝就對昆明恐襲驚到徹夜難眠，事關當佢睇電視新聞見到昆明火車站血肉橫飛，即時嚇到彈起，馬上打畀身在昆明做作家嘅囡囡，得知對方平安，即時鬆一口氣，「下令」囡囡火速返港，幸好囡囡亦願意日內飛返香港向家人派定心丸，又會幫媽咪搞珠寶展，暫時唔返昆明住。
東華三院第一副主席兼晚宴籌委會主席施榮恆就痛斥暴徒行為好冷血，戥無辜百姓被害感到心痛。佢早前被病痛入侵「生蛇」，搞到頭腫眼腫，幸好喺中西醫夾攻下，火速痊愈，無礙籌備慈善晚宴。
