政壇：搞搞政：同「人」唔同命 政團評分工黨尾二
連日來被建制派陣營公開質疑其公正性嘅香港大學民意研究計劃，一於懶理批評，尋日公布「十大政治團體」排名，佢哋喺上月十七至二十日、即財政預算案發表前訪問約一千名市民，調查結果發現十大政團評分幾乎全線下跌，冇一個政團評分合格。其中最騎呢嘅係職工盟蟬聯第一，相反由職工盟秘書長「阿人」李卓人一手催生嘅工黨，知名度就長期墊底，十大不入之餘，仲跌到尾二，認真係同「人」唔同命喇！至於街工同支聯會亦跌出榜外。
設計圖片及對白
阿人當年同張超雄、何秀蘭等同路人組織工黨，就係想藉工黨打響名堂，壯大喺立法會嘅勢力。工黨同職工盟一樣由阿人苦心經營，但工黨到依家喺區議會冇地區樁腳，似乎阿人嘅如意算盤仲未打得響。究竟係啲黨友唔爭氣吖？定係阿人顧得職工盟，顧唔到工黨發展呢？
民調仲發現工聯會急瀉至一九九一年民調開展以來嘅新低，唔知同身兼行政會議成員嘅該黨榮譽會長鄭耀棠早前接受航空公司豪華收機團款待，以及對強積金對沖等勞工議題長期縮埋有冇關係呢？
白鴿黨亦唔好得好多，雖然市民認知率高達八成七排第二，但最新評分就破九四年創黨以來新低。由於民調喺該黨前主席「AV仁」何俊仁喺預算案宣讀期間睇艷照事件前進行，相信仲未反映市民對AV仁醜行嘅不滿，話唔定該黨喺下次民調評分大跌都未定。
