政壇：鬍鬚曾嚇人嚇上癮
財爺鬍鬚曾喺新一份財政預算案提出「香港七年後出現結構性財赤」嘅恐怖預言，畀外界狂轟佢靠嚇，而由佢成立嘅長遠財政計劃工作小組日前公布詳細報告為佢解畫，兼提出七招建議延後財赤出現。有官場中人爆料，鬍鬚曾對報告建議設立嘅「未來基金」好有興趣，食髓知味下打算再緊急召集小組委員歸隊，深入研究基金用途同七招建議嘅可行性。
設計圖片及對白
小組已開會50幾個鐘
鬍鬚曾上星期發表嘅預算案繼續「炒冷飯」兼沿用「狼來了」舊橋，唬嚇港人「香港七年後出現結構性財赤」，又引述小組建議設立未來基金為日後嘅基建項目找數，以彌補政府早年因為銀根短缺而延遲推出基建項目嘅陰影。雖然佢再次大叫「財赤了」，即使政府盈餘年年「低開高收」依然引起市民恐慌，擔心財赤真係降臨。原本諗住隨着報告公布就可以「收工」嘅專家、學者，睇怕要焗住歸隊踢埋下半場。
被急召歸隊嘅小組委員包括科技大學經濟學系主任「雷公」雷鼎鳴，佢仲透露，小組報告原本仲有啲更「恐怖」嘅情節，只係唔想嚇親市民刪減咗咋。
唔通鬍鬚曾想收埋啲嚇人數字備用，留番下年預算案再嚇港人？唔通佢真係嚇人嚇上癮？
其實，雷公原本打算今年休假一年歎世界，下半年再赴北京大學出任訪問學者。不過，報告一出，佢不但要連日落區解讀報告內容，就算預約咗今日做白內障手術，聽日又要即刻動身出席電台節目解讀報告。雷鼎鳴透露，小組舊年已經開咗五十幾個鐘頭會議，估唔到報告出咗爐都未放得工住。睇嚟呢份義工真係唔易做。
