三堆一爐再闖關 至怕又煲無米粥
港府警告三個堆填區如果 無法擴建，「垃圾圍城」指日可待。太一叮從未質疑過呢番話，港產官僚預告福為民開就話吹水唔抹嘴啫，自揭減廢無計搞到垃圾為患咯喎，絕對係毋庸置疑嘅「廢」腑之言喇。呢，就講擴建堆填區同興建焚化爐吖，屢敗屢戰又屢戰屢敗，若然今次闖關又鎩羽而歸，「垃圾圍城」嘅預言隨時噩夢成真。
環境局尋日向立法會環境事務委員會交代所謂嘅「三堆一爐」方案，即係擴建現時三個堆填區以及喺石鼓洲興建一座焚化爐。局長黃錦星話喎，估計今年中將方案提交財委會申請撥款，其中焚化爐方案因為涉及司法覆核，所以會先進行招標，等官司了結之後至批出項目咁話。佢仲再次警告，如果「三堆一爐」方案遭否決，本港每日將積存數以萬噸計嘅垃圾喎。
鬼唔知阿媽係女人咩！垃圾問題日趨惡化，盲嘅都睇到喇，問題係官僚衙門充斥人形廢物，「三堆一爐」計劃隨時又功虧一簣，變咗煲無米粥咋！
冇錯，處理垃圾問題，唔係堆填，就係焚化，選擇不多，問題係當局做妥一切保護措施未吖？擺平一切反對聲音未吖？如果未嘅話，就算方案真係十萬火急，最後又係淪為官僚無能嘅陪葬品嘅咋。呢嗱，呢邊當局喺議事堂內解畫，嗰邊民間團體喺議事堂外示威，抗議港府喺未釋除居民疑慮嘅情況下再硬闖立法會，直情係炮聲隆隆，有人批評港府未有做好減廢及回收工作，有人直斥當局漠視堆填及焚化帶來嘅禍害，有人指摘官老爺企硬闖關係不尊重居民意願。你話喇，民間怒火仲猛烈過焚化爐，「三堆一爐」方案係咪分分鐘又畀人當垃圾送入堆填區吖。
講到尾，現實世界冇人希望厭惡性設施放喺自己後花園，呢個係地區利益與全港利益嘅矛盾，難以調和，以當局嘅弱勢同笨拙，拆彈談何容易吖。更何況，家陣嘅角力戰場仲唔止香港添，由於當局窩囊，搞到垃圾為禍，唔止臭名遠揚吖，仲臭味遠揚添，一河之隔嘅深圳同胞忍無可忍，早前發起簽名運動反對香港擴建堆填區。即係話，「三堆一爐」計劃亦牽涉到深圳利益與香港利益嘅矛盾角力，當局連港人都擺平唔到，點說服群情洶湧嘅隔籬鄰舍吖？
太一叮實在唔想用垃圾嚟形容當局過去一年幾嘅工作，不過黃局長上場以嚟勞而無功，一事無成，係不爭嘅事實。擴建堆填區闖關已經衰咗兩次，如果今次又衰埋，就係「三衰一爐」，衰嘢共冶一爐咁解，叮！
