話說雙辣招經歷連番波折後，最終喺炳炳局長一招「牙齒當金使」同「飯民」拉隊離場下，終於戲劇性成功闖關。大功告成，炳炳局長決定去茶餐廳，食番碗最愛嘅酸辣米線賀一賀佢。

炳炳局長一落完單，就發覺財爺鬍鬚曾居然坐咗喺隔籬枱，於是同佢打聲招呼︰「咦，乜咁啱呀！」鬍鬚曾笑住答︰「係呀！預算案差唔多搞掂晒，咪嚟歎杯中產最愛嘅咖啡囉！」話音未落，咖啡送到，鬍鬚曾呷咗一啖，即刻嗌出嚟︰「嘩！乜杯咖啡咁苦嘅？」伙計望都唔望就答咗句︰「見你咁鍾意減甜，咪畀杯齋啡你歎吓囉！」鬍鬚曾嬲到吹鬚睩眼。

旁邊食花生嘅炳炳局長忍緊笑嗰陣，酸辣米線亦送到，點知一食入口，居然完全唔辣，炳炳局長問伙記︰「點解碗酸辣米線一啲辣味都冇？」伙記指住碗米線話︰「呢啲叫『先減辣，後審議』，局長你無理由唔知o架？」炳炳局長一聽，當堂被激到七竅生煙，四腳朝天。

第一手消息請下載on.cc東網iPhone/iPad/Android/Windows Phone Apps