城中鏡：馬化騰泵水入同程網
內地電子商貿行業鬥到七國咁亂，創業者要生存就要有大靠山，如果唔係就只會畀大企業「通吃」，好似專搞旅遊網上訂票嘅同程網就泊到好碼頭，畀由馬化騰做主席嘅科網巨人騰訊睇中，仲牽頭入股五億元，隨時有力挑戰網上訂票老大攜程網！
同程網泊到由馬化騰（圖）做主席嘅科網巨人騰訊呢個碼頭，競爭力大增。
同程網今次搵到騰訊呢座靠山，都可算捱出頭來，但創辦人吳志祥自言創業過程好辛酸，尤其面對規模比自己大十倍嘅攜程網，壓力唔講得笑。佢仲話同程網除咗做訂機票同酒店之外，做門票亦出色，咁就惹嚟攜程網嘅「關注」，咁就死喇，仲唔Mark到你實咩。佢話攜程網一直想喺同程網挖人才，舊年底仲索性喺公司對面租埋辦公室，擺明車馬撬人。
所以吳志祥都奉勸想喺電子商貿大展拳腳嘅公司要保持危機感，千祈唔好引起巨頭嘅「關注」，否則好難有好日子過。佢呢番話正好反映內地電子商貿嘅競爭已到弱肉強食境地。
