城中鏡：李鋈麟靠東華起底
位於東華三院文物館一樓嘅「馮鳳華紀念文化古迹廊」尋日舉行命名典禮，由東華前總理馮丹藜捐款二百八十萬元支持保育，以其母親名字命名。副主席施榮恆同李鋈麟等都有捧場。
李鋈麟（右）同施榮恆一同參與文化古迹廊嘅命名儀式。
東華三院檔案及歷史文化總主任史秀英（右二），向眾人展示部分未公開過嘅文獻。
東華三院前主席李三元（左）同歷史學專家丁新豹，對保護東華文物不遺餘力。
該文物館前身為一九一一年落成嘅廣華醫院大堂，左邊偏廳係以前嘅議事廳同帳房，而右邊則為舊診症室，目前已被列入為法定古蹟。一樓嘅文化古迹廊擺放咗東華三院由一八七○年成立以來嘅重要牌匾，包括九大善堂之一嘅廣州愛育堂一八七一年時送贈嘅「惠周海外」牌匾，以及清朝總督李鴻章聯同三位官員於一八八四年送贈嘅「見義勇為」牌匾等。
部分館藏文獻亦係首次公開，包括各種醫療檔案、會議記錄及書信等，而該院嘅檔案及歷史文化委員會正逐步將所有珍貴資料數碼化，方便公眾日後查閱。
邊個接生都查到
講起館內保存妥當嘅記錄，李鋈麟自爆同東華三院好有淵源，事關佢喺廣華醫院出世，細個有乜頭暈身都會去東華三院屬下嘅廣華醫院睇病。
李鋈麟又話媽媽一直唔肯講佢嘅出生時辰八字，可能驚江湖術士落降頭加害佢，直到後來佢喺廣華醫院翻查記錄先知道自己幾點出世，仲連邊個醫生接生都知道埋添！
