政壇：搞搞政：「馬拉松」變評論員為港鐵補鑊

政府早前委任肥亨做港鐵董事，有傳係為佢接任主席鋪路。雖然佢尋日冇回應傳聞，但就似足港鐵發言人，為港鐵近日接連發生事故補鑊，話港鐵一日接載幾百萬名乘客，運作非常之好，屬港人引以為傲嘅品牌，強調事故唔關系統性或老化問題，相信管理層會努力做得更好。不過，佢講講吓就話自己講多咗，應該交番畀港鐵講好啲喎！

做過財經事務及庫務局局長嘅肥亨當年建議開徵銷售稅，但阻力太大，最終都係要擱置。佢話未來五至七年香港財政都係好穩健，儲備充足，就算增加經常開支都可以應付，但再遲多幾年就令人擔心喇，所以要未雨綢繆。

跟住佢又維護財爺鬍鬚曾估錯數，話每個部門需要錢推動政策，但推行期間會遇到好多問題，未必成功，同時稅收好難估計，計得出亦會有誤差，估錯係好閒嘅事，反而市民應該集中注意力，睇吓嚟緊嘅預算案對民生有乜影響。

到最後佢繼續硬銷前財爺梁錦松係下屆特首適當人選。正因為咁，最近有人就幫肥亨改咗個花名叫「馬拉松」。點解？唔使畫公仔畫出腸喇啩！