政壇：許照中破例減佣吸客
六福金融主席兼行政總裁許照中，一向批評業界「零佣金」作風，搞到中小證券行無啖好食。不過，佢尋日話為咗生存，不能坐以待斃，都要主動出擊，六福金融將會減佣吸客，每單trade（交易）最低收費低至十蚊雞，都咪話唔震撼！
許照中
雖然對比小部分經紀行嘅幾蚊一個trade，十蚊仍然唔係全城最低，但六福金融一向都好少用減佣呢招，睇嚟銀行同部分經紀行「零佣金」風氣真係殺埋身，其他經紀行都要「跟風」，加上政府又死都唔肯恢復最低佣金，中小經紀行亦不得不向現實低頭。
許照中話基本上網上股票交易，成本唔高，今次佣金優惠，適用於新開嘅網上交易戶口客戶。佣金將會降至八滴（即百分之零點零八），每單trade最低收費十元，更推出首月免佣，優惠上限為五百九十元。佣金優惠期至今年十二月底。佢仲大搞噱頭，「買股票，傳愛心」。客戶每單trade，六福金融會從收取之佣金中捐出一蚊畀慈善機構。
