立法會九龍東前議員「肥仔明」李華明，以往農曆新年都會落區寫揮春、扮財神，搞到老中青見到佢都四萬咁口。不過，佢嘅繼任人胡志偉就比較木訥，學唔到肥仔明善於氹人嘅性格，唔識得寫揮春、扮財神，反而好唔好彩，手疾就得肥仔明真傳。

胡志偉右手患上腕管綜合症，即係俗稱嘅「滑鼠手」。

肥仔明以前成日落區派傳單，又成日同街坊揮手，揮揮吓就揮出個「網球手」嚟，點知志偉右手原來亦患上腕管綜合症，即係俗稱嘅「滑鼠手」。佢話十幾年前睇過醫生，相信係因為佢寫字嘅時候姿勢唔好，加上近年用電腦時間愈嚟愈多，咁就變成長期病患喇！

雖然好似患上咗「不治之症」，但係胡志偉都會用熱水加鹽浸吓隻手，都算可以紓緩一下病情。佢又話有時打籃球射籃嗰下，隻手都會隱隱作痛，但都唔理嘞，唔會因為手痛就連運動都唔做。

第一手消息請下載on.cc東網iPhone/iPad/Android/Windows Phone Apps