政壇：官員議員不知民生疾苦
立法會尋日舉行新春午宴宴請一眾官員及行政會議成員，秘書處趁新正頭玩遊戲搞吓氣氛，考考高官、議員，點知發現佢哋連同民生息息相關嘅嘢都唔清楚，好難信佢哋會了解民間疾苦囉！
官員玩遊戲對民生問題一知半解，難怪張建宗（左三）都扁晒嘴喇。
高官隊成員有環境局局長黃錦星、勞工及福利局局長張建宗同新上任嘅政府新聞處處長聶德權，同佢哋對陣嘅議員就有王國興、譚耀宗同葛珮帆。遊戲問題都係一啲日用品價錢、交通票價同公共設施收費等。好似官員隊被問到四百五十克幼鹽幾多錢，而原本答案係一元五角至二元，佢哋就估三、四元，你估真係有市民「盲搶鹽」咩！
不過，議員隊都唔係醒好多，答咗豆豉鯪魚一罐要成三十元，而真正答案係十三至二十元。唔單止咁，佢哋對公眾設施收費都唔多清楚，其中一題係要兩隊估公眾泳池成人月票收費，兩隊都冇人答啱，議員比正確答案嘅三百元估貴咗二十三元，點知高官隊仲離譜，竟然答九十元，搞到主席曾鈺成都忍唔住寸班官員︰「呢個收費係咪口頭承諾嚟o架？」
講到市民最關心嘅樓價問題，班官員竟然估算將軍澳一個居屋貨尾單位要四百五十萬元，但實價只係三百二十萬元，變相估貴咗四成，難怪市民對政府打擊炒樓冇信心嘅！
