政壇：張炳慘勝傻強要醒定
喺運輸及房屋局局長張炳良扭盡六壬，出埋口術作出「口頭承諾」，俗稱樓市「辣招」嘅買家印花稅法案（BSD），早幾日終於戲劇性喺泛民主派立法會議員集體離場下通過三讀，但政府未能鬆一口氣，因為雙倍印花稅（DSD）仍然喺立法會審議當中，預計最快要四月至有機會表決。呢次個波交畀財經事務及庫務局局長「傻強」陳家強，會唔會又好似張炳咁幾乎搞到焦頭爛額呢？
設計圖片及對白
尋日DSD法案委員會開會，泛民主派議員涂謹申突然變咗幫政府，諗晒唔同情況下，乜嘢人會藉此避稅圖利。佢話根據現行機制，如果市民物業被強制回收重建，買第二層樓時可獲豁免繳交DSD。但唔少「有心人」就會借漏洞「搵食」，夾埋十幾人以低價買入一間將會重建嘅舊樓單位，就算打埋DSD都係二、三十萬，然後等政府或私人發展商收購後，佢哋就拎住份契去換樓，但當然係換豪宅、貴價樓，由於可以獲豁免DSD，咁變相交少好多稅，亦令DSD失去阻嚇性。
地產及建造界議員石禮謙聽完後都猛咁點頭，話呢個真係一個大漏洞，好在阿涂有講，仲叫政府諗吓點修補漏洞，就連平時唔多出聲嘅進出口界議員黃定光都覺得唔妥。阿涂事後話，咁做係想政府加辣，千祈唔好以為佢想減辣喎！面對地產界代表同建制派都出聲，與會嘅財庫局官員惟有話返去研究一吓。
阿涂突幫政府兜底
阿涂同石禮謙突然變咗政府「大好友」，幫政府兜底，同之前BSD完全判若兩人喎。不過，呢條DSD法案一日未到投票，都唔知邊個係人、邊個係鬼？政府喺BSD一役啱啱先喘定，陳家強梗係要靜觀其變，然後謀定而後動喇！
