家貧偏逢物價貴 悲情城市多悲情

呢，有團體調查東涌、天水圍、荃灣同元朗四個區嘅生活必需品售價，結果講都冇人信，原來天水圍物價普遍比鄰近嘅元朗貴一成半至三成，部分達到五成；東涌亦唔好得去邊，物價平均比荃灣貴一成，有啲食品甚至貴一倍添。

係人都知，東涌同天水圍呢啲新市鎮有唔少公共屋邨，係低收入家庭相對集中嘅地區。呢啲家庭嘅日常開支本來已經捉襟見肘，加上返工返學交通費不菲，家陣連生活必需品都貴過人，你話係咪雪上加霜吖？唔怪得天水圍畀人叫「悲情城市」喇，睇怕東涌嘅悲情都差唔多嘅咋。

點解會愈窮愈見鬼呢？原因好簡單，呢啲偏遠新市鎮欠缺競爭，購物場所被領匯或大財團壟斷，物價自然唔會平喇。好似天水圍咁，區內七個街市六個由領匯管理，領匯憑着壟斷優勢，引入大量連鎖式店舖，扼殺小商戶生存空間，而且瘋狂加租，商戶惟有將成本轉嫁畀消費者。嗱，呢啲咪就係港產官僚規劃失當所種下嘅惡果囉。

正如關注團體話齋，扶貧唔係得派錢一招，當局應該善用公帑為基層製造就業機會，推動社區經濟發展。開講有話，好嘅開始係成功嘅一半，壞嘅開始就係失敗嘅一半，新市鎮之所以搞成咁，完全係因為政府開壞咗個頭。本來呢，一個完善嘅新市鎮應該有各項配套設施，可以滿足當區居民生活所需，提供包括交通、街市、醫療、康樂同學校等設施；更重要嘅係，新市鎮可以提供當區就業機會，唔使舟車勞頓，山長水遠到區外搵食。可惜結果啱啱相反，好似天水圍呢啲新市鎮簡直係樣樣都冇。

最好笑嘅係，當局為咗補鑊，去年喺天水圍搞咗個「天秀墟」，由政府撥地畀東華三院管理，話就話為區內弱勢社群提供自力更生機會，點知官僚敷衍了事，冇做好完善配套，只係考慮辦事方便，由撥地到提供基本設施樣樣因陋就簡，結果開業之後人流稀疏，門堪羅雀，商戶拍晒烏蠅，怨聲載道。所以話，港產官僚食嘢唔做嘢，做嘢打爛嘢，簡直弄巧反拙。

正所謂，前車之覆，後車之鑑。新市鎮配套不足，製造悲情，唔該當局吸取教訓，發展其他新區嘅時候必須考慮配套設施同創造就業機會，否則隨時又多幾個悲情城市嘅咋，叮！