SUN奇古怪：Sun潮語：恩主
上個星期，一批示威者響應網上號召，喺尖沙咀廣東道發起一個名為「驅蝗」行動嘅遊行。約百幾個號稱本土派嘅示威人士，部分打住港英殖民地時代嘅龍獅旗，目的係宣示香港人對個人遊旅客氾濫嘅不滿。示威期間出現咗另一批愛國愛港勢力出嚟，兩班人隔住一條廣東道對罵。隨後更有「驅蝗」行動嘅示威者指罵大陸旅客，部分商店索性暫時關門避風頭，有啲旅客嚇到退入店舖避禍。當日電視新聞訪問咗幾位大陸遊客，有幾位又再重申如果唔係有大陸人嚟消費，香港早就玩完，同埋另一句被網民戲謔為難聽過粗口嘅說話：「大家都係中國人。」呢幾句陳腔濫調，唔單止土生土長嘅香港人覺得反感，就連大陸人自己都覺得呢種「恩主」嘅心態唔要得。有大陸人仲喺網上發文探討「恩主」心態，當然嗰篇文，難逃發表之後被河蟹嘅命運。
「恩主」呢個詞語係嚟自大陸，隨住個人遊政策開始失衡，加上內地有部分訪港旅客嘅言論，令到「恩主」喺香港變得流行，成為潮語。「恩主」呢個潮語係用嚟形容一種心態，雖然又「恩」又「主」，充滿基督教色彩，但係呢個心態同宗教無關。「恩主」係指一啲人嘅心態覺得，香港人應該對祖國感恩，因為經中共喺大陸不斷宣傳，收回香港嘅主權，係中華人民共和國一次偉大勝利，中國喺英國人手中奪回香港主權，而多年嚟祖國不斷「照顧」香港人，令港人過得比以前更幸福，所以香港人理應對中國感恩戴德，以致不斷有大陸人對香港人話，冇咗大陸香港死梗，呢種既無知又脫離現實嘅「恩主」言論。
事實上，香港係奉行一國兩制、高度自治、港人治港。中英聯合聲明同《基本法》寫到明香港係有別於大陸任何一個城市。加上所謂食水、糧食等照顧，全部都係香港真金白銀同你買，係百分百嘅商業貿易，仲要貴人哋幾倍。回歸十幾年，大陸除咗帶嚟「沙士」、「禽流感」同大批只值5%GDP嘅個人遊經濟之外，就係一大批嘅「新香港人」同大陸嘅文化。試問，我哋如何恩主呢？
