政壇：徐立之疑似入主創科局

有資訊科技業界消息話，政府正研判各界對正、副局長可能人選嘅接受程度。學術界方面，暫時傳出最少有四名疑似人選，包括前年有傳內定為局長嘅理工大學行政副校長楊偉雄、身兼城市大學副校長嘅賽馬會前資訊科技事務執行總監李惠光、即將離任嘅香港大學校長徐立之，同埋中文大學工程學院副院長（外務）黃錦輝，都係熱門嘅正、副局長人選。

早前話對政治冇興趣

咦！徐立之早前話對政治冇乜興趣，又話想份新工要酬勞有番咁上下，仲要唔使負咁大責任、提供住宿同做得開心，做局長係咪佢杯茶呢？

本來正、副局長人選嚟自學術界都唔出奇，但最新曝光嘅人選竟有嚟自警隊通訊科高層，消息話此人即將退休，長期參與創新科技範疇嘅工作，加上對政府同立法會運作有一定認識，不失為其中一個可以考慮嘅人選。

究竟最終邊個可以脫穎而出，依家仲係言之尚早，因為先決條件都係要成功落實設立創新及科技局，即係要立法會批准開設新政策局先至得，否則一切只係紙上談兵。仲有，就係無論邊個做都好，入得熱廚房，都要好硬淨，頂得住內外壓力先得。