環境局局長黃錦星前日發表「香港廚餘及園林廢物計劃二○一四至二○二二」報告，搵咗政府問責官員撰寫獻詞撐場。點知好衰唔衰，畀人發現財經事務及庫務局局長陳家強搞錯咗啲廚餘數字，將港人每日丟棄約三千六百噸廚餘，講咗做三千九百噸，足足報大咗成三百噸廚餘。陳家強尋日就大呼冤枉，話段獻詞事前畀環境局睇過晒，對方話冇問題先至出街。今次佢真係畀人老點，跣咗一鑊囉。
陳家強喺廚餘報告嘅獻詞入面話，香港呢個繁忙城市，每日產生九千噸都市固體廢物，其中廚餘約佔四成共三千九百噸，相當於二百五十架雙層巴士重量，呼籲大家齊響應減少廚餘。不過，原來佢講緊嘅係「易腐爛廢物」數據，即係除咗廚餘之外，仲包埋園林廢物同個人護理棉製品，點知環境局睇漏眼。環境局尋日辯稱，份報告講緊政府將來點樣處理廚餘同園林廢物，陳局長將兩個數據加埋一齊，佢嘅講法冇錯喎！
第一手消息請下載on.cc東網
