政壇：朱克伯格嫌錢腥着睡褲見人

十年前朱仔創立fb嗰陣，莫講話立志靠佢發達，直頭冇諗過長搞，反而睇好搞緊嘅另一個社交網站Wirehog，但紅杉好識貨，想注資入fb。不過，fb另一始創人帕克當年搞社交網站Plaxo得過紅杉注資，但後來慘被踢出董事局，帕克懷疑係紅杉有份興風作浪。殷鑑不遠，朱仔於是唔想收紅杉嘅錢。

喺朱仔要見紅杉當日，朝早八點嘅會佢唔單止特登遲到，仲着住條睡褲現身。但佢又「hea」唔晒喎，整咗個題為「唔好投資十大理由」嘅PowerPoint，數臭fb冇收入、實畀樂壇告、我遲到兼着睡褲、帕克都有份搞等等，仲型到話：「我出席只係因為你哋一個合夥人叫我嚟！」

朱仔幾年後接受《facebook效應》作者採訪嗰陣，都承認為當年嘅胡作非為感到愧疚，紅杉亦多年來都冇染指朱仔嘅事業，包括fb。