潮流興減廢,唔少城中名人都身體力行齊將廚餘變花肥。中華總商會永遠榮譽會長蔡冠深太太蔡關穎琴話,早前親自去日本買咗部家用廚餘機返港,試用咗兩個幾月,愈用愈開心,晚晚用部廚餘機製花肥後即刻撒落屋企花園,唔止減少製造垃圾,仲慳番買肥料嘅錢,真係一舉兩得。佢話減廢原來咁簡單,建議政府應該帶頭做起。

蔡關穎琴用廚餘機自製花肥後,即時撒到花園施肥。(受訪者提供)

梁唐青儀(中)積極推動減少廚餘,陳趙滿菊(右)同羅台秦(左)全力支持。

國際華商協進會日前舉行春茗,有份出席嘅特首夫人梁唐青儀都分享點樣喺家中用廚餘機自製花肥,佢會用廚餘製造出嚟嘅鬆泥,再添加些少肥料自製花肥。同場嘅東區區議會前主席丁毓珠聽到梁太咁講顯得興致勃勃,急問梁太部廚餘機係乜嘢牌子。珠姐話兩年前已響應梁太嘅校園「齊惜福」號召,喺旗下兩間維多利亞中小學引入廚餘處理系統,成效好好,校方使用廚餘製造肥料,種出好多好靚嘅番茄同薑。

台北經濟文化辦事處處長嚴重光都有到場,梁太盛讚台灣喺垃圾收費方面行得比香港快,台北嘅家居垃圾仲因此勁減逾六成,佢話港台可以多啲交流,令香港推動垃圾收費時更加順利。國際華商協進會會長陳趙滿菊同副會長羅台秦見講座咁受歡迎,勁開心。

第一手消息請下載on.cc東網iPhone/iPad/Android/Windows Phone Apps