政壇：招待夏千福建仔言行不一
美國駐港總領事夏千福（Clifford A. Hart）自舊年七月底來港上任後，一直高調落區大打親民牌，兼頻頻向香港各界收風傾政改，早已令北京強烈不滿，除咗官媒批評佢對香港事務說三道四，建仔成員都叫過佢講少句當幫忙。不過，建仔尋日竟邀請夏千福參加喺該黨總部舉行嘅工商專業新春酒會，建仔高層仲同夏千福談笑風生，唔知呢啲係咪叫講一套做一套呢？
建仔高層同夏千福（右）談笑風生。
建仔主席譚耀宗主持祝酒儀式時叫大家唔好參與佔領中環行動，傾政改應該有商有量。在場嘅夏千福似乎冇乜反應，事後問佢點睇佔中行動，佢就話唔評論。唔知係咪身處建仔主場唔敢亂講嘢呢？
儀式完咗，夏千福又即時主動行去台前同譚耀宗打招呼，兩人傾咗幾分鐘，跟住立法會議員蔣麗芸（Ann）上前加入討論。阿Ann用普通話同夏千福講，話聽聞佢啲普通話講得好好，問佢點解會講得咁好？夏千福就用番普通話回答，話「不知道」。
