立法會尋日繼續馬拉松式審議樓宇買家印花稅（BSD）「辣招」條例草案，預計今日可以進行三讀表決。不過，立法會體育、演藝、文化及出版界議員馬逢國就唔係咁開心，原因並唔係因為BSD講足幾日都未投票，而係因為一條BSD搞到佢原本排喺後面嘅議員議案要順延到三月中大會先可以辯論。

冬奧後討論冇晒話題性

馬逢國原本喺今個大會上提出「制訂長遠體育政策」嘅議員議案，討論本地體育發展，但由於尋日立法會仍然未完成BSD法例審議工作，所以要將佢嘅議案押後至下月十九號大會上先至可以辯論。馬逢國尋日悶悶不樂咁話，今次係佢第二次因突發事故而要更改或押後辯論議員議案，覺得自己唔係咁好彩囉。

佢話舊年六月，美國中情局「走佬特工」斯諾登來港披露美國政府入侵本港電腦系統事件，原本佢已喺立會提出一條緊急口頭質詢，但後來覺得應該等立會有更多時間討論事件，於是就將自己原本提出、有關本地體育發展嘅議案改成討論斯諾登事件。點知依家又因為BSD而搞到佢條議案無得辯論，原本佢諗住趁依家舉行緊索契冬季奧運，立會可以藉此討論吓點樣加強本地體育發展，但如今佢嘅議案又要押後辯論，到時乜嘢話題性都冇晒啦，都唔知傾嚟做乜。換言之，洩晒氣啦！

講起體育發展，立會足球隊原本喺今午同旅遊界代表踢友誼賽，但亦都因為討論BSD而臨時取消。莫非本地體育發展真係要停滯不前？

第一手消息請下載on.cc東網iPhone/iPad/Android/Windows Phone Apps