紅加東減不可行 電子道路更不通

為咗解決隧道車流失衡問題，港府當年花咗幾百萬元請顧問公司研究，提出「紅隧加價、東隧減價」嘅大計，原定今年下半年試行。結果喺一片反對聲中，當局不得不跪低，宣布放棄「紅加東減」，理由係公眾諮詢顯示民意雖支持改變隧道收費促成車流轉向，但對當中三個方案未有主流睇法，而且舊年紅隧嘅每日車流量已經比二○一一年下跌三千架次，而東隧就增至七萬三千架次，一旦實施「紅加東減」，隨時進一步增至逼近上限嘅七萬六千架次。運輸及房屋局局長張炳良話喎，為咗改善交通擠塞，政府會喺一七年通盤考慮三隧分流方案，並研究喺中區推行電子道路收費計劃。

研究復研究，諮詢復諮詢，拖咗十年，結果得個吉，你話係咪搵嚟搞吖？港產官僚好做唔做，唔只浪費光陰，而且浪費金錢，簡直九唔搭八。

至於講到電子道路收費咯喎，更加不知所謂。早喺上世紀八十年代，港英政府已經積極研究電子道路收費，減少行車流量，但由於環境及條件都唔可行，而且遭到市民強烈反對，當局被迫束之高閣。家陣政府重彈舊調，唔使問阿貴，到頭來咪又係得個講字！

仲有吖，港府話就話研究平衡三隧車流，但點解講嚟講去都唔提西隧，淨係對紅隧及東隧大做文章呢？正如有人話齋，家陣車流最少嘅係西隧，收費最貴嘅亦係西隧，港府應該回購西隧，然後大幅減價，先至係對症下藥嘅解決辦法。

話時話，當局聲稱紅隧車流略減，其實根本係自欺欺人，紅隧邊日唔塞車吖？近年唔只紅隧日日塞車，東隧車流亦不斷增加，反映現有嘅海底隧道唔夠用，最好嘅解決辦法就係興建第四條海底隧道，就算未必可以迫使西隧同東隧減價，起碼都可以畀駕駛人士多個選擇吖！

事在人為嘅啫，堂堂政府連隧道問題都束手無策，講出嚟都笑死人喇。就講深圳吖，當年亦因為梧桐山隧道收費問題引起交通阻塞，當地政府同隧道公司談判破裂，立即動用四十五億元開設第二通道，結果唔夠兩年，問題迎刃而解。深圳政府做得到，點解港府做唔到？

一句到尾，三隧分流唔係冇辦法，問題只在官府有冇決心解決。再咁拖落去，睇怕再拖多十年都未能搵到解決方案，叮！