城中鏡：郭秀雲為海下灣發聲
香港有好多富自然景觀價值嘅地方，西貢海下灣就係其中一個，名媛郭秀雲（Sharon）就好鍾意呢個地方，一個月前佢再訪當地，行吓沙灘、觀吓雀鳥，佢話，最希望將來令海下灣成為世界保護區或者歷史文物。
郭秀雲身體力行保育海洋，希望西貢海下灣可成為世界級受保護區域。
西貢海下灣
Sharon尋日出席一個宣傳海洋保育嘅活動，講到海洋保育，佢透露十幾年前曾經到海下灣進行珊瑚礁普查，不過當時無了解過海洋保育，一個月前，佢跟隨其他環保團體再到海下灣，呢次就獲益良多。尋日嘅活動現場都播放咗一段佢到海下灣嘅影片，行沙灘時，Sharon忍不住大讚當地風景優美，佢話嗰度係一個好靚嘅地方，行咗十幾分鐘，總共見到幾十種雀鳥，最有趣嘅係佢哋行嘅沙灘喺地圖顯示係陸地，令人摸不着頭腦。佢話：「我覺得呢啲咁靚嘅地方，無人出聲嘅話，無咗就係無咗。」
