城中鏡：黃玉山讚肯學肯試 睇好港青
唔少青年人未畢業已憂慮出路，甚至有調查發現香港露宿者學歷有提升同年輕化嘅趨勢，嚟緊四月即將上任公開大學（公大）校長、現任科大副校長嘅黃玉山認為，呢啲調查數據只係個別事件，唔擔心會影響年輕人入讀大學嘅意欲。佢話，學位增加係社會需求上升所致，好多年輕人仍然係非常勤力上進，相信大學生仍有發展空間。講講吓，佢仲自爆當年負笈加拿大時都捱過世界，打工體驗辛苦，磨練個人意志。
黃玉山話學歷上升係社會趨勢，欣賞時下年輕人肯學肯試。
許華傑（左）及張俊勇（右）都讚霍啟山（中）係青委會主任合適人選。
黃進達話唔介意犧牲同家人相處嘅時間，全情投入青年事務。
黃玉山出席香港廣東外商公會及廣東省工商業聯合會舉行嘅聯歡及青委會就職禮，眼見一班成功青年才俊熱心推動會務，聲言唔擔心香港大學生嘅前途，又勉勵同學唔使因為近日嘅新聞而氣餒，因為人生有好多條起跑線。佢又話，雖然大學畢業唔保證換來一份好工，而「一手文憑一手聘書」嘅時代亦已過去，但呢個現象係社會走向知識型經濟無可避免嘅趨勢，但自我增值有助擴闊個人發展空間，家長亦會希望子女入到大學。
許華傑：啟山係筍盤
黃玉山又大讚時下年輕人肯學肯試，部分更唔介意由低做起，令佢回想自己當年喺加拿大讀研究生嗰陣，都有喺餐館打工做侍應捧餐，晚晚做到凌晨一兩點先至收工。其實當年佢有獎學金，唔需要打工應付學費同生活費，但為咗體驗生活，辛苦啲都唔怕，因為磨練可以令人更強。
講番青委會，今年由霍啟山擔正做主任，而加入呢個會多年嘅顧問許華傑同副主任張俊勇就話要畀多啲機會後生，尤其青年事務最需要一個有朝氣、有活力嘅年輕才俊去推動，啟山就係最合適人選喇，許華傑仲盛讚啟山係「筍盤」，叫女士千祈唔好錯過喎。同場仲有擔任副主任嘅康泰旅行社總經理黃進達，佢話希望為青年事務作貢獻，唔介意犧牲同家人相處時間喎。
