啱啱過咗嘅星期日，有人唔去參加渣打馬拉松（我係講一籃子男子），佢哋卻走咗去尖沙咀玩「驅蝗行動」，喺啲外國名店門口與大陸旅客對罵。這類驅趕內地個人遊土豪的活動，近一兩年，出現過無數次，最終，總是「徒勞無功」的不了了之！

但今劑「驅蝗」，竟令未來特首大熱的林鄭月娥率先搶閘帶頭狂插那批「搞事分子」，繼而幾個局長跟尾嚴厲叫陣；昨日，才輪到梁特首登場指摘，再來，連港澳辦亦蒲頭大表不滿。一單不大新鮮的活動，卻反常地，成為大陸媒體的大新聞，真有點怪異！

點解，香港廢柴政府同現身「不顧港人高度自治原則」的港澳辦會有咁大反應的呢？

本欄一直以持平客觀理性著稱，睇住香港廢柴政府高層庸才唔做嘢，才令到班港人谷到爆而行出嚟自救，是值得理解的！但如今反被指行為粗野兼遭譴責，實在戥他們唔抵！佢哋都係愛香港、想香港好㗎啫！否則毋須要動真火嗌破喉嚨啦！不過，佢哋亦可以斯文啲去教育內地客嘅！尤其教佢哋愛國，例如，派人站在外國名店門前，呼籲大陸同胞不要買「外國勢力」的貨品，帶他們去國貨公司買國貨，甚或勸阻佢哋唔好去外國消費，留番喺祖家使錢，即使來到香港，亦只去灣仔金紫荊朝拜就夠，勿去美帝的迪士尼公園。嗱！依家迪士尼又話起新酒店呀！一定要用中國人的設計先得呀！最好就係北京傳媒大廈成碌男根豎起那款，仲要金色外牆，咁先夠雄壯！

一於日日在老尖唱紅歌跳秧歌舞，早日同內地接軌，不再傷害兩地人民感情，實現兩地融合，大紫荊勳章都有份攞，咁咪好囉！做乜要驅蝗蟲啫！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps