政壇：搞搞政：田二少與前助理恩怨難解
政界嘅人事離合，可能涉及政黨樁腳、選票流失或者更多嘅利益轇轕，新民黨立法會議員田北辰（田二少）近日再有職員跳槽，有報道仲引述田二少話，其中一個跳槽嘅前助理趙恩來（阿來）過檔工黨，連喺地區工作三年嘅資料都帶走埋。阿來尋日就出聲明反駁前僱主，話田二少所講嘅嘢與事實不符，要佢收回言論兼道歉，否則就會認真考慮採取進一步法律行動。田二少就話，佢所講嘅係有根有據，如果阿來採取法律行動，佢就會交畀律師處理。
設計圖片及對白
過檔後被踢爆原來係支聯會青年組義工嘅阿來，依家已經係工黨社區幹事。佢尋日就出咗份書面聲明，話佢本人離職後絕對冇竊取原公司任何財產，仲話雖然大家嘅政治立場唔同，但「君子之爭，講事實擺道理」，唔需要為求目的抹黑對方咁話，對田二少嘅不實、誹謗言論極度遺憾喎。田二少就話，因幾個街坊向佢投訴，話阿來離職後仲聯絡佢哋，質疑阿來點解會有呢啲街坊嘅個人資料。
田、趙恩怨並非一朝一夕，有傳阿來一直心儀荃灣愉景新城選區，奈何田二少就決定自己上位，阿來去年投向工黨後未有放棄愉城區，仲密密落區派傳單，又擺檔受理街坊投訴，擺明向前僱主田二少挑機。睇嚟佢哋真正爭嘅係選票同地盤就真。
