政壇：周浩鼎踢泛民入會盞搞

離島區議員周浩鼎（Holden）去年夥拍經常一齊上《城市論壇》指點時事嘅「維園阿哥」，成立香港青年時事評論員協會（青評會）兼任主席，但過去一年，呢班「阿哥」都係建制派圍內嘅第二、三梯隊成員居多，來自泛民主派陣營嘅成員近乎零，建制味日濃。

Holden近排鬼鬼祟祟想拉攏對家「乳鴿」南區區議員區諾軒，同青年公民主席梁穎敏入會，想話兩大陣營嘅聲音都咁清楚，可惜似乎只係佢一廂情願。

青評會尋日舉行新春團拜，《城市論壇》常客李梓敬、新民黨青年委員會主席甘文鋒等都現身撐場，但Holden作為主人家就起勢捉住區諾軒同梁穎敏密密斟，原來佢係想踢二人入會。

不過，區諾軒話要笠多頂帽除咗睇個人意願，仲話要得到黨主席劉慧卿首肯，先可以填表交會費。至於梁穎敏亦顯得相當猶豫，睇怕Holden硬食呢兩個大檸檬後，青評會想發圍要再諗諗計喇。