政壇：建制派促泛民中央溝通
政改諮詢以來各方動作多多，有親中重量級人士分析，中央早前至少兩次釋出善意，首先係中聯辦回請立法會議員飯局，但礙於部分泛民拒絕進入中聯辦而無疾而終，其後係上周四中聯辦新春酒會，又首次邀請泛民議員出席，但最終只有不足十人到場。佢直言，部分泛民視同中聯辦交往溝通係「洪水猛獸」，咁樣嘅態度點可以同中央進一步溝通呢？
據佢分析，今年適逢係國家成立六十五周年，倘邀請全體泛民到北京參加儀式，的確可以再次釋出善意，但到時泛民若又拒絕，雙方嘅溝通就唔知點好喇。咁樣本地政制恐怕會落得原地踏步嘅結果。
建制人士憂慮，泛民方面則繼續撐，堅持公民提名之外，另一關注係二○一七年普選特首時，泛民背景參選人能否成功「入閘」並「出閘」，有親中消息指，有泛民中人私下表示可接受候選人數目訂於五人，「預料到時實掂」，然而泛民依家仲係「耍無影腳」，未有觸及政改核心問題，因此呼籲泛民認清中央係「受軟不受硬」，同時不要過於計算選票得失，為達成普選共同努力。
